بابرنامه نینگ عرب تیلیده ترجمه سی، تنیقلی تورکولوگ دکتور ماجده صلاح مخلوف
یقینده اوزبیک خلقی‌نینگ اتاقلی فرزندی شاعر، دولت اربابی، مؤرخ و متّفکر ظهیرالدین محمد بابر تولدی‌نینگ 530 ییللیگیگه بغیشله‌ب خلق ارا علمی کنفرانس اوتکزیلدی. اوزبیکستان پایتختی تاشکیت شهری‌نینگ مرکزیده جایله‌شگن علی شیر نوایی نامیده‌گی مُحتشم دولت کُتبخانه‌سیده اوتکزیلگن بو انجمنده اروپا، آسیا و افریقا قطعه‌لریدن تشریف یویورگن ییریک بابرشناس عالملر اشتراک ایتدی. قاهره یونیویرستیتی (مصر) پروفیسوری، تورکولوگ دوکتور ماجده صلاح مخلوف خانم «بابرنامه» نینگ عرب تیلیده چاپ ایتیلگن نسخه‌نی تقدیم ایتر ایکن بو ترجمه اوستیده ییگیرمه ییل تدقیقات آلیب بارگنینی تأکیدله‌ب اوتدی.
منه ایندی فرصتدن فایده‌لنیب بو بویوک ایشنی بجرگن خانم نینگ، پروفیسور دکتور شرعی جوزجانی قلمی بیلن یازیلگن ترجمۀ حالی نی سیز عزیز اوقوچیلرگه تقدیم قیله میز:
«تنیقلی تورکشناش عالم دوکتور ماجده صلاح مخلوف 31 جنوری، 1953 ییلی قاهره شهری نینگ النزهة الجدیدة منطقه سیده توغیلیب وایه گه ییتدی. عالی تحصیلاتنی توگتگندن کیین قاهره نینگ مشهور دارالفنونی «عین شمس» اونیویرستیتیده قوییده گی اورینلرده ایشلب علمی ایشلر بیلن شغللنیب کیلدی:
- ادبیات فاکولته‌سی، شرق تیللری و ادبیاتی دیپارتمینتی ده معید، 1973.
- ادبیات فاکولته‌سی، شرق تیللری و ادبیاتی دیپارتمینتیده مدرس مساعد، 1978.
- ادبیات فاکولته‌سی، شرق تیللری و ادبیاتی دیپارتمینتیده مدرس (استاد مساعد)، 1983.
- ادبیات فاکولته‌سی، شرق تیللری و ادبیاتی دیپارتمینتیده استاد مساعد، 1990.
- ادبیات فاکولته‌سی، شرق تیللری و ادبیاتی دیپارتمینتیده عثمانیلر تاریخی و تورک تیلی استادی، 2001.
او، 2006 ییلدن بیری، اوشه دارالفنون نینگ ادبیات فاکولته‌سیده شرق تیللری و ادبیاتی دیپارتمینتی نینگ رئیسی صفتیده ایشلب کیلماقده.
دوکتور ماجده اکادمیک جهتدن تورک تیلی، عموم تورک تیلی و بو ساحه ده علمی تدقیقات و ایزلنیشلر آلیب باریش تخصصیگه ایگه، اما دقیق ساحه ده او، (19 عصردن اعتباراً) ینگی تورکیه تاریخی نینگ متخصصی دیر.
دوکتور ماجده صلاح مخلوف بیرینچی بولیب ظهیرالدین محمد بابر نینگ «بابر نامه» کتابینی چیرایلی اسلوبده عرب تیلیگه اوگیریب، اونینگ بیرینچی قسمینی نشردن چیقردی. شونینگدیک بابرشاه حقیده «بابرشاه شخصیتی نینگ انسانی و ادبی قرره لری» ناملی 140 بیتلیک کتاب یازیب نشر قیلدی. بیز اوشبو چیرایلی کتاب و بابرنامه ترجمه سی حقیده علیحده مقاله آرقه لی حرمتلی اوقوچیلرگه معلومات بیرماقچیمیز. حاضر اونینگ علمی تیکشیریش اساسیده یازیلگن «مصرده گی اوزبیکلر» عنوانلی مقاله سی نینگ اوزبیکچه ترجمه سینی تقدیم ایته میز.
استادنینگ نشر بولگن علمی اثرلریدن ایریملری:
- اتاتورک خطابه سیده خلافت حقیده فکرلر، دارالآفاق العربیة، 2000 ییل.
- صدراعظم لطفی پاشانینگ «خلاص الأمة فی معرفة الائمه» اثری نینگ تحقیق و نشری، دارالآفاق العربیة، 2001 ییل.
- عثمانیلر قصریده حرمسرا.
- بابرشاه تاریخی، فرغانه واقعه لری (2001). (بابرنامه عربچه ترجمه سی نینگ فرغانه واقعه لریگه تیگشلی قسمی. مترجم).
- بابرشاه نینگ ادبی و انسانی تامانلری (2000).
- حرمین شریفین (مکه و مدینه) و حج مناسکی بوییچه عثمانیلر قیلگن خدمتلر، تورکچه دن ترجمه (2005).
- سلطان سیوگلی سی- خرم سلطان مکه و مدینه اوچون قالدیرگن وقفیه سی نینگ تحقیق و نشری (2005).
- تورک ادبیاتیده عرب مُقامه نویسلیک صنعتی نینگ تأثیری- عرب تیلیده گی عیدی زاده مقاماتی نینگ تدقیق و نشری.
- عربچه و تورکچه ادبیاتده اتحاد و ترقی توشونچه لری. عبدالحمید سقوطی چاغیده ناهید سری اوریک داستانی بیلن جورجی زیدان یازگن عثمانی انقلاب داستانی نی قیاسی اورگنیش.
- مسلمانلر نینگ غرب تمانیگه یوز توتیشی، اوچینچی سلطان سلیم ریفورملری.
- «اسلام فتوحاتی اطلسی» ده عثمانیلر فتوحاتیگه خاص بولیم نینگ نظارتی.
- عصرلر آشه مصر عیاللری، عیاللر ملی مجلسی- قاهره.
- مصر، حبشه و سودانگه اولیا چلبی سفری ترجمه سی نینگ تکمله سی.
- تورک یازوچیسی علی نارنینگ «عسل اریلری (زنبورلری) مملکتی داستانی» ترجمه سی.
- عثمانیلر دوریده، اسلامی تقنین یاروغلیگیده مصر ولایتی نینگ اداری قانونی، قانون نینگ تولیق متنی ترجمه سی بیلن، دارالآفاق العربیة، قاهره، 2008 ییل.
بولردن تشقری دوکتور ماجده مخلوف نینگ بیر قطار مقاله لر و علمی تیکشیریشلری نشر بولگن. اولردن ایریملرینی ایسلتیب اوته میز:
- ینگی اسلام دنیاسیده اصلاحات بوییچه آلیب باریلگن حرکتلردن بیرینی بهالش.
- عیسی یوسف الپتگین ملت رمزی، سکزینچی خاطره سینی نشانلش مناسبتی بیلن.
- شرقی تورکستان، اسلامی تمدن توقیمه سیده.
- ایدئولوژی و تاریخ یازیش، ساطع الحصری و عثمانیلر دولتی تاریخینی یازیلیشی.
- ارمنلر و عثمانی دولتی.
شونینگدیک او بیر قطار علمی بحثلر و ماسترلیک و دوکتورلیک دیسسیرتتسیه لری (علمی رساله لری) نی نظارت قیلیب، بیرنیچه مصر و عرب اونیویرستیتلریده گی علمی تیکشیریشلر کمیته لری ایشلری نیینگ مستحکملش بوییچه همکارلیک قیلیب کیلگن.
خانم دوکتور ماجده صلاح مخلوف ایریم خارجی مملکتلرده تورلی موضوعلر بوییچه یولگه قوییلگن خلق ارا کنفرانسلر، جمله دن تاشکینت شهریگه یونسکو تمانیدن «تاشکینت اسلام مدنیتی پایتختی» عنوانی بیریلگنی مناسبتی بیلن خلق ارا مقیاسده تشکیل تاپگن کنفرانس اشتراکچیسی دیر.»
منبع لر:
1- اوز فکر سایتی، بابرشناسلیک بولیمی، «بابرنامه عرب تیلیده» گزارشی، کریلدن عرب الفباسیگه اوگیرگن: ا. بیانی.
2- «مصرلیک تنیقلی تورکولوگ دکتور ماجده صلاح مخلوف حقیده» پروفیسور دکتور شرعی جوزجانی قلمی بیلن یازیلگن ترجمۀ حال.
بولوت وبلاگی
هـدف مـا منسجم ساختن روشنفـكـران، فرهنگيان و بالخصوص جوانان با استعداد و مردم با احساس افغانستان در زيـر يك سقـف واحد به خاطـر بـلـند بردن سطـح دانـش و رشـد فـرهـنـگ غـنامـنـد كـشور ميباشد.