بولوت

بیر قطار تشکیلی، عملی و مالی مسئله لر بوییچه تصمیم آلیش اوچون رهبریت هیئتی تامانیدن چقیریلگن «بابر کلتوری انجمنی» نینگ اونینچی قورولتایی، شنبه کونی 19 جنوری 2013 ییل، ستاکهولم شهریده موفقیت بیلن بولیب اوتدی. قورولتای گه انجمن اعضالری نماینده لریدن قرق کیشی قتنشگن ایدی. قورولتای توشونچه سی اوستیده توختلیب، اونینگ لغـوی مفهومی و تاریخی اهمیتی حقیده گپیریب، دیدی: قورولتای تورکی خلقلر تاریخیده اینگ عالی تصمیم آلوچی و اینگ مهم حیاتی مسئله لر بوییچه قرار قبول قیلوچی کینگاش صفتیده بیلگی لاوچی رول اوینب کیلگن و تاریخی ایز قالدیرگن. مثال صورتده 1373 هجری ییلی بلخ شهریده بولیب اوتگن قورولتای گه یوز گه یقین تورکی قبیله لر باشلیقلری و صلاحیتلی آقسقال لری قتننشگن ایدیلر. قورولتای بیر آواز بیلن صاحبقران امیر تیمورنی بوتون تورکستان و خراسان خاقانی قیلیب تعیینله دی و اولکه نینگ رواجلتیریش عمومی ریجه سینی تصدیقلب، دولت ایشلرینی کینگاش (شورا) اساسیده آلیب باریش بوییچه اونگه یوللنمه لر بیردی. بیز نینگ قورولتاییمیز سان یوزه سیدن کیچیک بولسه هم، اوز آلدیگه قویگن عالی مقصدلر یوزه سیدن کتته اهمیت گه ایگه.

قورولتای انجنیمیز نینگ کلتوری و مدنی حیاتیده بیر بوریلیش نقطه سی بولیب برچه میزنی اوشبو مقصدلرگه ایریشیش اوچون سفر بر قیلیش بیلن بیرگه، تازه روح و کوچ بغیشله شی کیرک. بوندن اون ییل مقـدم تیمور اونگوت، نعمت الله بیکزاده و سید یونس آرقه لی تأسیس ایتیلیب، کریم جویا، بابر جوزجانی، کاظم نیازی و محمد یوسف اشتراکی و صمیمی فعالیتلری بیلن رواجلنیب کیلگن انجمنیمیز، ینگی بیر باسقیچ عرفه سیده توریبدی. حاضر گه چه کدر لریمیزنینگ هر بیری عملی و فرهنگی فعالیتلرگه فعال حصه قوشیب، قول لریدن کیلگونچه خدمت کورسه تیب کیلگنلر. تورلی مناسبتلر بیلن اوتکه زیلگن محفل لر و مراسملر، بونینگ گواهی دیر.

شونینگدیک انجمن اعضالری سرپل اهالیسی باشیگه توشگن آغیر مصیبت- مدهش سیل فاجعه سی اوچون غم- شریکلیک کورسه تیب، آز بولسه هم 1400 دالر یاردم یوباریش بیلن اهالی ایچیده یخشی خاطره قالدیردیلر. لیکن بجریلگن ایشلر قانیقرلی ایمس، نیگه که بیزنی کوتیب تورگن وظیفه لر و عملگه آشیریلیشی ضرور بولگن ایشلر جوده کوپ. شو سببلی رهبریت هیئتی انجمن تشکیلاتی نی قیته کوریب چیقیب، اولرگه اوزگریش کیریتیشنی ضرور دیب تاپدی. مین اوشبو ینگیلیکلر بیلن سیزلرنی تانیشتیریش مقصدیده آجنده نی تصویبدن اوتکزیب، اونینگ اساسیده مجلس ایشینی آلیب باریش وظیفه سینی انجمن معاونی تیمورجان اونگوت گه تاپشیره من. اوندن کیین تیمور اونگوت سوزگه چیقیب اجنده نی مجلس اعضالری تصویبیدن اوتکزگندن کیین، ییغیلیش ایشینی آلیب باردی. او، تورت ییل جریانیده انجمن باشلیغی وظیفه سینی قانیقرلی شکلده بجریب کیلگن حقوق فنلری دوکتوری پروفیسور عبدالحکیم شرعی جوزجانی حقیده فکر بیلدیریب، بیز استاد نینگ لیاقت و کفایتی گه ایشانه میز، شونینگ اوچون جناب لری نی ینه هم ریاست وظیفه سیگه سیلش اوچون کاندید قیله من، دیدی. تکلیف کنگره اعضالری تامانیدن استقبال بولیب، آواز گه قوییلدی. استاد شرعی جوزجانی بیر آواز (اتفاق آرا) بیلن بابر کلتوری انجمنی رئیسی ایتیب سیلندی و بو انتخاب قورولتای اعضالری تاماماندن گولدراس قرسکلر بیلن کوتیب آلیندی. اوندن کیین قوییده گی کیشیلر انجمن رهبریتی اعضالری صفتیده پیشنهاد قیلندی و کنگره اعضالری تامانیدن بالاتفاق (بیر آواز بیلن) تصدیقلندی:

ــ تیمور اونگوت بابر کلتوری انجمنی معاونی

ــ ثریا سید بابر کلتوری انجمنی معاونی

ــ کریم جویا مالی ایشلر مسئولی

ــ کاظم نیازی سکرتر و ویب سایت تخنیک ایشلری مسئولی

ــ اکبر حامدی علی البدل عضو

ــ بابر جوزجانی مالی ایشلر مفتشی

ییغیلیش ایشی دوامیده ینگی تشکیل ایتیلگن شعبه لر و اولر نینگ وظیفه لری حقیده معلومات بیریلیب، مسئول کیشیلر کاندید قیلیندی. بوحقده کنگره اعضالری تامانیدن بیلدیریلگن فکر و ملاحظه لر نظرده توتیلگن حالده آواز گه قوییلیب اتفاق آرا بیلن تصدیقلندی. شعبه لر و اولرنینگ مسئول لری قوییده گی لردن عبارت:

ــ تعلیم و تربیه بولیمی مسئول: تیمور اونگوت

ــ خاتین- قیزلر و میده باله لر بولیمی مسئول: ثریا سید

ــ سپورت بولیمی مسئول: محمد آصف

ــ محفل و مراسملر تشکیلی بولیمی مسئول: نعمت بیکزاده

ــ موسیقی گروهی بولیمی مسئول: محمد یونس سید

شونینگدیک جلسه ایشی جریانیده کاظم نیازی بابر ویب سایتی نینگ ترقلیش ساحه سی باره سیده معلومات بیریب، اونینگ مخلص و علاقمند لری نه فقط افغانستان و سویدن ده، بلکه امریکا، کانادا و اروپا دولتلریده هم کوپیگن و حاضر هرکونی 300 گه یقین کیشی و هر آیده 10000 گه یقین کیشی بابر سایتی گه کیریب ایستگن نرسه لرینی اوقیب بارماقده دیدی. اوندن کیین انجمن حق العضویتی مقداری و بولیب اوته دیگن محفللر و مراسملرده اشتراکچیلر اوچون آوقت (طعام) تییارلش مسئله سی اورته گه تشله نیب، تورلی فکر و نظرلر ایشیتیلگندن کیین قرار لر قبول قیلیندی. ییغیلیش سونگیده تیمور اونگوت انجمن رئیسی نی صحبت گه تکلیف قیلدی. پروفیسور جوزجانی قورولتای اعضالریگه قره ته قوییده گی دیک صحبت قیلدی:

«بابر کلتوری انجمنی نینگ اوننچی قورولتایی نی تمثیل ایتوچی عزیز و حرمتلی اشتراکچیلر! بیرینچیدن، انجمنیمیز نینگ اوننچی قورولتاییگه اکتیف اشتراک ایتیب، اورته گه قوییلگن مهم مسئله لر بوییچه اوز فکر و ملاحظه لرینگیزنی بیلدیریش بیلن انجمن نینگ اوسیش و رواجله نیشیگه کتته حصه قوشگه نینگیز اوچون رهبریت نامیدن برچه نگیز گه تشکر بیلدیریب، ایشلرینگیزده موفقیت تیلیمن.

ایککیینچیدن، کمینه گه ایشانچ بیلدیریب، انجمن رئیسی صفتیده سیله گنینگیز اوچون چین کونگلدن ممنونیت اظهار ایتیب، اوشبو اعتمادینگیزنی عملاً آقلش گه حرکت قیله من. سیزلرنینگ قرارینگیز اساسیده منه تورت ییلدن بیری اوشبو وظیفه نی بجریب کیلماقده من. شو مدت دوامیده رهبریت اعضالری نینگ برچه سی، بولیب اوتگن طنطنه لی مراسملرنی مناسب شکلده اوتکزیش اوچون برچه امکانیتلرنی ایشگه سالدیلر. مین انجمن نامیدن اولرگه تشکر بیلدیره من. بابر سایتی، یعنی بابر انجمنی نینگ یوزینی کورسه ته دیگن کوزگونینگ علمی ادبی ایشلری اساساً کمینه گه تیگشلی. سایت نینگ تخنیک ایشلری، اونینگ ظرفیتینی کینگیتیریش، صفتینی یخشیلش و ینگی امکانیتلر کیریتیش بوییچه کاظم نیازی ایش آلیب باره دی. البته ایسله تیب اوتیش کیرک که دوستیمیز محترم مسعود عزیزی بو ساحه ده کیرک بولگنده هیچ قنداق تخنیک یاردمینی بیزلردن ایه مَی کیلگن. شونینگ اوچون اونگه تشکر بیلدیره میز. سایتده سوید تیلیده نشر بوله دیگن اینیقسه باله لر تربیه سیگه عاید متیریاللرنی تیمور اونگوت تییارلیدی. شو اورینده ایتیش کیرک که اوتگن 4 ییل جریانیده بابر سایتیده 250 دن کوبراق مضمون و متیریال نشر بولگن ایکن. اولرنینگ اساسی قسمینی علمی، ادبی، تاریخی، اجتماعی، کلتوری و بعضاً سیاسی مقاله لر تشکیل ایته دی. اولر دن ایریملری باشقه منبعلردن اقتباس قیلینگن یا که سایت نینگ دائمی همکارلری جمله دن محمد حلیم یارقین، غلام سخی سخا، همایون سرخابی، دوکتور جلایر عظیمی، عبدالله تاشقین، عزیز فاریابی و بیر قطار شاعر و ادیبلر قلمی گه منسوب بولسه، قالگنلری کمینه نینگ تحقیق و تتبعی و ایجادی محصولی دیر. سایتیمیز باشقه ویب سایت و ویبلاگلر جمله دن «بولوت»، «کابل پرس» و «فـفتا» بیلن دائمی همکارلیک قیلیب کیلماقده. بیز بعضاً اولردن کیرکلی متیریاللرنی اقتباس قیله میز، اولر هم بیزنینگ مضمون و مقاله لریمیزنی اقتباس ایتیب نشر قیله دی. مثلاً نیچه کون آلدین بی بی سی تورکی خلقلرنی کم سیتیب، حقارت قیلیب یازگن مقاله سی گه جواباً یازیلگن «شبکۀ فارسی بی بی سی ناشر اندیشه های شونیستی» عنوانلی علمی و مستند مقاله میز، آریایی، ففتا و کابل پرس آرقه لی نشر بولگن ایدی. بو معقول و حقانی دفاعیه کینگ کولملی خواننده لر اعتبارینی تارتیب، قیزیقیش بیلن کوتیب آلیندی. ایریم متعصب تار فکرلر قرشیلیک کورستگن بولسه لرهم، باشقه لر تامانیدن اولرگه قطعی و مستدل جوابلر بیریلدی. بو، انجمنیمیز باره دیگن یول نینگ توغری لیگیدن دلالت بیره دی.

حرمتلی دوستلر! برچه نگیزنی انجمنیمیز یوتوقلری بیلن تبریکلب، همه لرینگیزگه موفقیت و ساغلام حیات آرزو قیله من.»

جلسه آخریده تیمور اونگوت تامانیدن، انجمن نینگ بیرینچی جلسه لریدن آلینگن بیر- ایککی ویدیو لوحه سورپریز صفتیده اشتراکچیلرگه کورسه تیلدی. اوندن کیین مهمانلرگه آوقت تارتیلیب، قورولتای ییغیلیشی نهایه سیگه ییتدی.

بابر کلتوری انجمنی ویب صحیفه سیدن آلیندی، راپورتر: کاظم نیازی

بیانی اجتماعی و فرهنگی بنیادی، «بابر کلتوری انجمنی» نینگ اونینچی قورولتایی نینگ تبریکلب، برچه انجمن اعضالریگه موفقیت تیله یدی. و همده اوشبو فرصتدن فایده لنیب، ینه بیر مرته اوز حمایه و بیرلیگینی بابر کلتوری انجمنی بیلن اعلان ایته دی.

حرمت بیلن

الماس بیانی

بیانی اجتماعی و فرهنگی بنیادی نینگ رئیسی