ضیأ خواجه منصوری افغانستانده خلقلر دؤستلیگی اوچون فعال خذمت قیلگن اوستاذ صنعتکارلریدن. او ۱۹۲۰ نچی میلادی ییلده تاشکند شهریده توغیلدی.  باشلنغیچ تعلیمنی توگه تیب، موسیقه کورسینی هم عین شو ییرده توگتدی. بو کورسده دوتار و سیتار چَلیشنی اؤرگندی. میلادی ۱۹۲۹-۱۹۳۰ ییللرده فاریاب، مزارشریف،سؤنگره کابلده عمر کیچیردی.

صنعتکار افغانستان ده استقامت قیله یاتگن اؤزبیک، ترکمن، تاجیک، پشتون و هزاره لرنینگ، اینیقسه، یاش لرنینگ ارداقلی صحبتداشی و صمیمی دؤستی ایدی.

منصوری نینگ افغانستان اؤزبیکلری تیلی و موسیقه سی رواجی اوچون قیلگن خذمتلری غایت اولکن. او اؤز اؤغیل- قیزلری و نیوره لریدن تشقری جودده کؤپ ترقی پرور یاش لرنی افغانستانلیک اؤزبیکلرنینگ ادبیاتی، شعریتی، تیلی و موسیقه سیگه محبت روحیده تربیه له دی. او دوتارنی علیحده شوق و ذوق بیلن چَلر ایدی. ضیا ٔ خواجه اکه چلگن دلنشین اؤزبیک کلاسیک کویلری افغانستان رادیوسی آرقه لی هوا موجلریده همیشه جرنگله ماقده.

ضیأ خواجه منصوری تامانیدن دوتارده زؤر مهارت بیلن اجرا ایتیلگن«مناجات»، «دلخراج»، «تناور»، «بیات»، «ایسکی تناور»،«راحت» و «صوت مسکین» کبی دلربا کویلر هیچ کیمنی لاقید قالدیرمس ایدی و آدملرنینگ زیبا پرستلیک ذوقینی آشیریب، اولرنینگ پاک و نفیس قلبلریگه بیر عالم قوت و مدد بغیشلردی.

کمینه «ایماق» افغانستان رادیوسی محلی پروگراملر اداره سیده ایش له یاتگن پیتیمده ضیأ خواجه منصوری نینگ دوتار و سیتار اسبابلری بیلن اجرا ایتیلگن کلاسیک کویلرینی ضبط ایتتیرگن ایدیم. بو کویلر ادبی ایشیتتریشلریمیزده دایما فایده له نیب کیلگن. بو کویلر حاضر هم افغانستان رادیو تلویزیونی نینگ موسیقه آرشیفیده سقلنماقده.

ضیأ خواجه منصوری جهان گذشته، تینیب- تینچمس، سیر غیرت و فعال انسان ایدی. او افغانستان نینگ دییرلی همه ولایتلرینی کیزیب چیققن. هندوستان، ایران، ترکیه، سعودی عربستانی، شورالر اتفاقی، آلمانیه و امریکا کبی خارجی مملکتلرده بؤلیب، اؤشه یورتلرده گی خلقلرنی افغانستان نینگ قهرمان، جنگآور، صلحدؤست و مهمانواز خلقی حیاتی بیلن تنیشتیردی. اینیقسه، اؤزبیکستان بیلن افغانستان خلقلری اؤرته سیده گی دؤستلیک و برادرلیک علاقه لرینی یخشیلشده منصوری نینگ خذمتلری کتته .

منصوری صنعتی نی اونینگ فرزندلری دوام ایتتیرماقده. اونینگ اؤغیللری و نیوره سی تامانیدن ایتیلگن دلنشین قؤشیقلر افغانستانده گی برچه اینی- آغه و برادر ملتلر اوچون ذوقبخش و یاقیملی. مشهور صنعتکار، افغانستانده اؤزبیک موسیقه سی نینگ ترقیاتیگه کتته حصه قؤشگن سازنده، اوستاد ضیأ خواجه منصوری اوزاق بیتبلیکدن سؤنگ میلادی ۱۹۷۹ نچی ییلده تاشکند ده وفات ایتدی. او وفات ایتگن بؤلسه-ده، براق اونینگ صنعتی و خاطره سی صنعت سیورلر قلبیده همیشه برحیات.

سویت اؤزبیکستانی صنعتی، ژورنالی ۶ نچی سان ۱۹۸۲ نچی ییل، تاشکند .یازووچی: دُکتور فیض الله ایماق