محمد یحیی حفیظی ، حاجی عبدالحفیظ بای اؤغلو ،۱۳۲۱ نچی هجری قویاش ییلی (۱۹۴۲عیسوی ییلدا) سرپل کئنتی نینگ بؤلوچخانه (بؤلوچ ، تورک اوروغلاریندان بیرینینگ آتیدیر و اولکه میزده تانیلمیش «بلوچ» لر بیرله قایسی بیر باغی یؤقتور) بؤلگه سینده بوآجونغا کؤزآچمیش.

  اؤ ، ایلک بیرله اؤرتا اؤگره نیمینی سرپل نینگ اؤشال چاغلارغاچا تئک ائرکئک اؤقولو بؤلغان منهاج سراج اؤرتا اؤقولودا بیتتیریب ، یوکسئک اؤگره نیم اوچون ایسه کابل یؤلونو توتادی. اولکه نینگ باشکئنتیده کی ، اؤردوغا باغلیغ ، بیر یوکسئک اؤقولدا اؤگره نیمگه باشلاغان شاعریمیز ، آنجاق قیسقا چاغ اؤتئر اؤتمه س اوچره دیگی بیرآغیرایگلیک (کسللیگ) یوزونده ن بول اؤگره نیمینی ایزله آلمای ، ۱۳۴۵نچی ییلدا اؤگره تیچی بؤلوب ایشغا کیره دی.

  استاد حفیظی ، ۱۳۴۵نچی ییلدان ۱۳۶۳نچی ییلغاچا ، جوزجان ولایتی نینگ آیریم کئنتلرینده کی اؤقوللاردا سئیله دیگی اؤگره تیچیلیگ قوتلوغ و تیگئرلیگ ایشی آرقالی یورتداشلاریمیزغا خذمت قیلغان. اولکه ده یؤروتولموش آغیر و یاووز سیاسی قؤشوللار اؤزره سئودیگی اؤگره تیچیلیگ مسلگیده ن آیریلیب ، بیرآرا آیریم اؤزلوگ ایشلار بیرله آوونغان حفیظی ، ۱۳۶۴نچی ییلدان ۱۳۷۰ گه چه جوزجان ولایتی نینگ کولتور یؤنئتیم باشقانی بؤلموش ایسه ده ، بول سؤروملولوق یانیندا یئنه جوزجان ولایتی شاعر لر بیرله یازیچیلار اویوشماسی باشقانلیغنی دا اوستلئنه دی.

  تورلوگ کولتور آلانغلاریندا یوکسئک قورلو سؤروملولوقلارنی کؤپ یاخشی تورگه بئجئرگئن حفیظی، جوزجان ولایتی ده ایلک کئزقورولموش امیر علیشیر نوایی کولتور بیرلیگی نینگ قوروچو قورولتاییدا ، اؤنغاقاتیلغان کیشیلر آرقالی شول قورومنونگ باشقانلیغیغا تالولانادی.

شونونگ دئک ، «آیینه تلویزیونو» گه اؤخشاش باشقا آیریم تؤپلومچوقوروملار بیرله کولتور آلانغلاریندا دا ایشلامیش ، هیچ قاچان اؤز بیلدیگلرینی باشقالارغا اؤگره تیشتئن آیاماغان محمد یحیی حفیظی ، شو ییل اؤکتوبر آیی نینگ ۲۰ سیده ، جوزجان ولایتی آیدینلاری نینگ ییغیلیشیندا اؤل ولایتته یئنگی قورولموش ففتا تمثیلچی لیگی نینگ باشقانی ده سئیلئنمیشتیر.

استاد حفیظی نینگ تورلوگ آلانغلاردا پیشیغ و اوزمانچا یازدیغی اؤزبئگچه و دریچه قؤشوغلاری بیرله شعر لری «جوزجانان» ، «بیدار» ، «ندای اسلام» ، «اولوس» ، «آیدین» کیبی اولکه نینگ باشقا آیریم گئزیته لرینده یایینلانیب تارقالسا دا ، اؤنونگ شعرتؤپلومو بوگونگه چه باسیلیب چیقیش اوچون بئکلئمئکته دیر.

آیتیش کئره ک ، محمد یحیی حفیظی یالنغوز گینه بیر اوزمان شاعر بؤلوب قالمای ، اؤنونگ یانیندا اؤ بیر اوزمان خطاط ، رسام و فکاهی یازاری دا دیر. قؤیودا شاعریمیز نینگ یازدیغی شعرلرینده ن بیر نیچه اؤرنئک کئلتیره میز :

عاقبت
 
خــوبــرو لــر عشقیدین دیوانـه بـؤلــدوم عـاقـبت
تیلـبه ینگلــیغ بی سر و سامانـه بؤلدوم عاقـبت
هر تمـان بـارسم باشیمغه آسماندن تـاش یاغـر
کــؤچــه لـر ده بـازی طفـلانــه بــؤلـدوم عـاقـبـت
آنه دین تؤققن کونیمدین کؤرمدیم بیر روز خـؤش
بو بــلا غــم قـؤلـیدین دیـوانـه بـؤلـــدوم عـاقـبت
هیچ کیم یارب مئنینگ دئک کؤرمسین آواره لیک
بول هـراسان دشتیغه سرسانه بؤلدوم عـاقبـت
یاد اؤل کـونـلـر که آسمانـغـه ییتردی رفــعـتـیـم
ای حـفـیـظـی یئر بیلـه یکسانه بـؤلدوم عـاقبـت

ائرک دیار

آزاده ائـرک دیـــاریــم جــنـت نـشـان ائـمـاس مو
اینقسه باغی و راغـی رشک جـنـان ائـمـاس مو

بــیــر ساری خـرمــن گــل بـیـر ساری خیل بلبل
صـحـن چـمن لریده خوش نغمه خوان ائماس مو

هـر سـاری کـؤز آچیبان قیلسانگ نظـاره آنـیـنگ
دامـان دشـتـی جـانـا طـرفـه جـهـان ائمـاس مو

بـیـگـانه اولـکـه لاردین ای اولکه داش ایناغـه م
ویــرانــه اؤز دیــاریـنـگ آرام جـان ائـمــاس مـــو

اؤز آنه ســرزمــین نــی بـیـگــانـه لرگـه تشـلاب
چـیـت اولـکه لرده یورگان حیف جوان ائماس مو

سـن اونـده محو عشرت من مونده غرق محنت
کــؤپ جای شرم و خجلت ننگ زمان ائماس مو

فــخـر ایلامـای نــه ایــلای آتیگــه ای حفـیـظـی
نـام و نـشـانــی آنینگ ورد زبـــان ائــمــاس مـو


شیدا لنمسون
 
هیچ عاشق من کبـی عشقـیـده شیدا لنمسون
یاکه مجنون دئک بؤلیب ایل ایچره رسوا لنمسون
 
چــیــن زلـفینگ نی آچیب جانا پریشان ایله گیل
مشک عطار رستـه سینده تـاکه بـــؤیا لنمسون
 
بــــو خـرام نـــاز بــیــلان چـیقسانگ اگر بازار ارا
خـلـق ارا غـلـغل تـوشیب محـشر برپـا لنمسون
 
مونچه هـم قـان تؤکمکی عشاق بؤلورمو دهـر ارا
قــؤرقـــرم جــاری بـؤلــیـب هـر یـانه دریا لنمسون
 
هوش قیلینگ یانیمده توتمانگلار رقیب نینگ آتینی
اوشـبــو سؤزنی ایشیتیب ایـت لار غوغا لنمسون
 
یـئـتـی شـهـر عشق نینگ عطـار کـبی طی ایلادیم
هیچ کیشی بول کوچه ده من بیرله همراه لنمسون
 
ای حـفـیـظـی شـعـریت ملکـیده بیشک سن امـیر
اوشبو تخت اوزره کیشی سن بیرله دعوا لنمسون

یازووچی : دکتور عبدالمنان تاشقین ، ارمغان انترنیت صحیفه سیدن آلیندی.     


استاد محمد امین متین اندخویی و استاد محمد یحیی حفیظی جوزجانی