ایککینچی قسمی

آزر و قــــازاق و تــتـــر بـــی گـــمـــان

بــرچــه نـی اسم ايله مجزا قيلـيب[5]

اسم قاليب ، تـرک مسمى[6] قيلـيب

چــيــگــره الــيــب اوز ارا نـــام ايــلـــه

کـون نـی اونـوتیب قـووانـيب شام ايله

بــويـلـه يـشـب بـيـر نـيـچـه مدت زبون

قـولـلری کوچسيز بـولوب و قـدی نـون

دشمـن آلـيـب ايلگيدن ايرکين ليـگـين

کـورسـتـيــب آزاد يـشـشـنـی قـيـيـن

ايـلـب اونــی اوتـمـيـشـيــدن بی خبر

قـيـده اوريــن تـوتـمـيـشـيـدن بی خبر

اورگــاتـيـبـان لـفـظ ، نــه مـعنـى انگـا

کورساتيب اونگه «نعم»اورنيده«لا»[7]

قلچیلیک آدابـيـنـی تـلـقـين ايـتيب

حـريـت افـکــاريـنـی تـوهــيـن ايـتـيـب

بـايـلـيـگـيـنـی تـارتـيب آليب بـی امان

مــلـکـيــنـی تـاراج و تــلان ايـلــه بـان

بــاشــيدن آلــيـب عـظـمـت تـاجـينی

يـوکـله تيب اوستیگه جهان باجـيـنـی

اوشـبو يوسـينده اوتـيبان کـوپ زمـان

کـوکـکـه چـقـيـب زاری و مينگ الامان

سـيـنـدن اوزیگه او نـجـات ايسته دی

اولـکـه سیگه ینگی حيات ايسته دی

ياره سیگه ايسته دی سيندن رفو [8]

جونکه دیگنسن اونگه «لا تقنطوا» [9]

برچه سی اميد ايله ايـش باشله دی

تـفـرقـه اوتيـنـی يـولـيـب تـشـلـه دی

بيرلیگ اوچون کيردی کوره ش يولیگه

گــاه بـاقـيـب اونگیگه ، گـه سولیـگــه

اوزلـيـگـيـدن بــا خـبــر اولــدی يــنــــه

بخت اونــگــه راهـــبـر اولــدی يــنـــه

خاصه بو اوزبيک ايلينينگ اولـکه سی

هیچ قچان بوکيلمه سين ايلکـه سی

فـطـرت و فيـض الله و چـولــپـان اويی

قــادری و آي بـيـک و عـثـمـان اويــی

غـیـرتـی بيرلن کـوتـريب خـلقی باش

تـتـرب اونـيـنـگ هيبتيدن تـاغ و تـاش

هـر بـيـری اوز مـلـکـيـده بـيـر ارسلان

هـــر بـيـری اوز اورنـيـده فـيـل دمــان

تشـلـب اسـارت صـنـمـيـن قـوينـيدن

قـهـر ايـلـه قُـلـلـيک کيشنين بوينيدن

اولـکـه سـيـن اعـلان ايتيبان مستقل

ايـرک ساری بـاسدی قـدمنی دديـل

چـينـدن اولوب اوز وطنـين ایگه سی

بـايـليگـی و علم و فنين ايـگـه سی

ســـرو ديــک آزاد تـوريـــب خـلــق ارا

فخر ايلـه دلـشـاد يــوريــب خـلـق ارا

تـيـکـلــه دی مـغـرور تــوريـب بويـينی

چـالـغو چالیب باشله دی اوز توييـنی

يــاش و قــريـلــر آلـيـب ايـلـگـه دوتـار

قيـزلـر ايـتـيـب رقص ، اوقـيـب يار- يار

بــــيــرم ايـتـيـــب کـوچــه و بــازار ارا

بــزم تـــوزيــب جــاده و گـــلــــزار ارا

ینـگی کيلين ديک بـيزه نيب پـايـتـخت

اونگـه کوليب مهر ايله باقماقده بـخت

هر يولـيـده يـوزتــه گـوزل جـلـوه گــر

هـر بـيـری شـيـريـن و لـبـی نيشکـر

يا رب اوزينگ فضـل و عـنـايـت بـيـلـن

اوز کــرمـيـنـگ بـيـرلـه هـدايـت بيـلن

اوشـبو گـوزل اولـکـه نـی معمور قيل

خلـقـلـرين کـونگـليـنـی مسرور قـيل

سـاقـلـب اونـی مفتـخـر و مسـتـقـل

خوف و خطر يول لـريـدن اسـره گـيـل

آلـتـيـنـی ديـن بـيـر اونگه آلتين قنـات

پـخـتـه و نـفـت و گـزيـدن بـيــر ثـبـات

کـوچ بـيـريـبـان خـلـقينی قـيل متحد

بـيـر بـيـريـگـه بـرچـه سينی مـعتمِـد

تـیـنچـلیک و صـلـح نصيب ايت انـگـا

کـتـتـه ظـفـرلـرنـی قـريـب ايت انـگـا

دايـم اولـوسـيـنـی قـيلـيب کـامـگــار

هـر ايـشـيـده ايـلـه نصـيـب افـتـخـار

بـاريـچــه گـردون يـوريشـيـدن نشان

تينگ يشه سين مستقل اوزبيکسِتان


تاشکينت شهری ، ۳۱ اگست ، ۱۹۹۲ییل ،  « یورک سرلری » کتابیدن

ایضاحلر:

1.         «ديوان لغات التورک» : بويوک تيلشناس عالم محمود کاشغری نينگ بویوک اثری .

2.         يوسف خاص حاجب نينگ شاه اثری .

3.         عليشير نوايی نينگ شاه اثری . 

4.         بابرنامه ، ظهير الدين محمد بابر نینگ تینگی یوق اثری .

5.         مجزا قيليب – اجره تيب.

6.         مسمي : اسم نينگ مضمون و ماهيتی .

7.         نعم : هه ، تصدیق سوزی .   لا : انکار و رد قيليش سوزی .

8.         رفو: تيکيش.

9.       «لا تقنطوا من رحمة الله» (تنگری نينگ رحمتيدن اميد اوزمنگلر). قرآن کريم : ۳۹ (زمر) سوره سی ، ۵۳ آيت.

بابر فرهنگی و کلتوری انجمنی نینگ سایتی دن آلیندی

      

            دکتور علوم ، پروفیسور عبدالحکیم شرعی جوزجانی